Інфармацыя аб правядзенні Міжнароднага дня роднай мовы
Самае дарагое ў жыцці – тое, што закладзена ў сэрца з ранніх год. Менавіта родная мова – сувязное звяно ў далучэнні дзяцей да агульначалавечых каштоўнасцей, традыцый і гістарычнага мінулага нашай Радзімы.
З мэтай папулярызацыі беларускай мовы, а таксама выхавання нацыянальнай самасвядомасці, любові да беларускай мовы 21 лютага ў ДУА «Сярэдняя школа № 8 г. Маладзечна» прайшлі мерапрыемствы да Міжнароднага дня роднай мовы пад дэвізам «Каб мова беларуская гучала”.
Дзень роднай мовы - гэта дзень, калi варта пацвердзiць вядомае: чытаць, пiсаць i думаць па–беларуску здольны кожны. Бо мова — тое, што нас аб’ядноўвае i робіць унікальнымі ў свеце.
Дзень роднай мовы — гэта добрая нагода яшчэ раз задумацца пра лёс і будучыню той мовы, якую мы завём нацыянальнай і матчынай, успомніць каларытныя і самабытныя беларускія словы. Мова жывая, пакуль на ёй гавораць.
У рамках свята настаўнікамі беларускай мовы і вучнямі былі арганізаваны і праведзены разнастайныя мерапрыемствы, была аформлена інфармацыйная прастора школы.
З самай раніцы была праведзена акцыя “ Моўны калейдаскоп”. Вучні ў нацыянальных строях сустракалі вучняў, іх бацькоў, настаўнікаў прывітаннем па- беларуску і запрашалі паўдзельнічаць ў моўнай матарэі. Прыемна, што жадаючых праверыць свае веды па мове было вельмі шмат. Была і ўзнагарода за правільны адказ – цукеркі.
У акцыі “ Азбукоўнік” прынялі ўдзел вучні 3-11 класаў. Дзверы класаў сталі ўяўнымі старонкамі беларускамоўнага слоўніка, на якіх можна было пазнаёміцца з самабытнымі словамі нашай мовы. Акцыя мела поспех. Вучні і настаўнікі з цікавасцю знаёміліся з каларытнымі, малавядомымі словамі роднай мовы.
Выстава малюнкаў “ Па старонках літаратурных твораў” дапамагла вучням і бацькам прыгадаць творы беларускіх аўтараў, якія вывучаюцца ў школе, падзяліцца сваімі ўражаннямі пра твор.
У час перапынкаў вучні паглядзелі прэзентацыю “ Беларуская мова – мелодыя сэрца”, а таксама сталі слухачамі песень на творы беларускіх паэтаў “ Еўрабачанне па-беларуску”.
Вучні 11 класа правялі “ Лінгвістычную спартландыю” сярод 5 -11 класаў. У час спартландыі вучні змаглі праверыць свой ўзровень валодання беларускай мовай, а таксама даведацца пра самабытныя беларускія словы.
Для вучняў 4 і 5 класаў была праведена відэавіктарына “ Ведаеш сам – навучы другога”, а таксама арганізаваны прагляд мультфільмаў на беларускай мове.
Цэлы дзень ў школе гучала жывая беларуская моова. І няхай яна была не на столькі дасканалая, як хацелася б, але кожны імкнуўся выказаць свае думкі на роднай мове. А ўдасканальваць уменне прыгожа і правільна размаўляць па-беларуску вучні будуць на занятках ў сваёй школе.
Дзень роднай мовы, думаецца, застанецца ў памяці нашых вучняў. Родная мова павінна жыць у сэрцы кожнага беларуса!
